Pisortanit pensionisiat pillugit Inatsisartut peqqussutaata allanngortinneqarneranik
Inatsisartut peqqussutissaattut siunnersuut

 

pillugu

 

Inatsisartut Isumaginninnermut Suliffeqarnermullu Ataatsimiititaliaata

aappassaanerinissamut

 

ISUMALIUTISSIISSUTAA

 

Inatsisartut Isumginninnermut Suliffeqarnermullu ataatsimiititaliaat suliarinninnermini ukuninnga inuttaqarpoq:

 

Inatsisartuni ilaasortaq Asii Chemnitz Narup, Inuit Ataqatigiit, siulittaasoq
Inatsisartuni ilaasortaq Ruth Heilmann, Siumut, siulittaasup tullia
Inatsisartuni ilaasortaq Mikael Petersen, Siumut
Inatsisartuni ilaasortaq Jakob Sivertsen, Atassut
Inatsisartuni ilaasortaq Loritha Henriksen, Kattusseqatigiit

Inatsisartut Isumaginninnermut Suliffeqarnermullu Ataatsimiititaliaata UKA 2001-imi siullermeerinerup kingorna Pisortanit pensionisiat pillugit Inatsisartut peqqussutaata allanngortinneqarneranik Inatsisartut peqqussutissaattut siunnersuut misissuataarpaa.

 

Tusarniaanermit akissutisiat

Allannguutissatut siunnersuut immikkut tusarniaassutigineqanngilaq, siunnersuut, UPA 2001-imi piginnaanngorsaaqqinnissamut ikiorsiisarneq pillugu Inatsisartut peqqussutaata akuersissutigineqarnerata, malitsigimmagu.

 

Siunnersuutip imarisai.

Siunnersuut saqqummiunneqarpoq UPA 2001-imi Piginnaanngorsaaqqinnissamut ikiorsiisarneq pillugu Inatsisartut peqqussutissaattut nutaatut akuersissutigineqartoq kiisalu siusinaartumik pensionisiaqarnermut piginnaanngorsaaqqinnermullu tunngasut aningaasalerneqartarnerisa allanngortinneqarnerat pillugu KANUKOKA-p Namminersornerullutillu Oqartussat akornanni isumaqatigiissutaareersut tunngavigalugit.

Tamatuma saniatigut siunnersuutip imarai aalajangersakkat siusinnerusukkut atuuttut atorunnaarsinneqarnissaat pillugu ikaarsaariarnermi aalajangersakkat.

Siunissami siusinaartumik pensionisiaqalerumaartunut aningaasartuutit affaat Landskarsimit, affaasalu aappaat kommunimit, akilerneqartassapput. Kommunit aningaasartuuteqarnerussutissaat ataatsimoortumik tapiissutit pillugit KANUKOKA-mut isumaqatigiissummut ilaatinneqarput.

Siusinaartumik pensionisiat aamma piginnaanngorsaaqqinnermut tunngasut aningaasalerneqartarnerisa allanngortitsivigineqarnerata kingunerisaatut pisortanit pensionisiat pillugit Inatsisartut peqqussutaata allannguuteqarnissaanik siunnersuuteqartoqarpoq, taamaalilluni taanna maannakkut Piginnaanngorsaaqqinnissamut ikiorsiisarneq pillugu Inatsisartut peqqussutaannut nr. 4-mut, 31. maj 2001-imeersumut naleqqussarneqassalluni.

Isumaginninnermut Suliffeqarnermullu Ataatsimiititaliap isumaqatigiittup inassutigaa Pisortanit pensionisiat pillugit Inatsisartut peqqussutaata allanngortinneqarneranik Inatsisartut peqqussutissaattut siunnersuut saqqummiunneqarnermisut iluseqarluni akuersissutigineqassasoq.

Taamatut oqaaseqarluni Inatsisartut Isumaginninnermut Suliffeqarnermullu Ataatsimiititaliaata Pisortanit pensionisiat pillugit Inatsisartut peqqussutaata allanngortinneqarneranik Inatsisartut peqqussutissaattut siunnersuut aappassaaniigassanngorlugu ingerlateqqippaa.

 

Asii Chemnitz Narup
Siulittaasoq

 

Ruth Heilmann                                      Mikael Petersen

 

Jakob Sivertsen                                       Loritha Henriksen